Ostiral honetan itzuliko da Barandika kantxetara, Gasteizen

Xabi Barandika Gernikako aurrelaria, egungo puntista onenetakoa dena, etzi berragertuko da Gasteizko Olabe pilotalekuan, ia bederatzi hilabete frontoietatik kanpo egon ostean (joan zen urteko uztailaren amaieran hautsi zuen eskuin belauneko lotailu gurutzatua).

Bere itzulerako partidua Araba Euskaraz Master Series txapelketan izango da, finalerdiak jokatuko baititu Lekerikarekin, Laducheren eta Zabalaren aurka.

Jai Alai Leagueko 6. lehiaketa izango da Gasteizkoa, eta, hain zuzen ere, Ligarako puntuak pilatzen hasi nahi du gernikarrak, denboraldi amaierako Lauko Finalean sartzen ahalegintzeko.

Izan ere, slam kategoria duten txapelketa gehienak (puntu gehien banatzen dituztenak) jokatzeko daude oraindik. Bi galdu ditu Barandikak (Winter Seriesa eta Cesta All Star), baina prest egongo da, Bilbo, Markina, Donibane Lohizuneko Nazioartekoak, Urrezko Xistera, Gernika eta Paueko txapelketak jokatzeko.