Bartzelonak eta Bayernek abantaila hartu dute

Bartzelonak eta Bayern Münchenek abantaila hartu dute Txapeldunen Ligako final-laurdenetako joaneko partidetan. Barçak 2-1 irabazi dio Atletico Madrili Camp Noun eta Bayernek 1-0 irabazi dio Benficari Allianz Arenan.

Bartzelonak gogotik sufritu du garaipena lortzeko. Atletico Madrilek aurrea hartu du markagailuan Fernando Torresek sartutako golari esker (0-1) eta koltxoneroak nagusi izan dira lehen zatian. Partida, ordea, 35. minutuan aldatu da; epaileak bigarren txartel horia atera dio Torresi eta Atletico jokalari bat gutxiagorekin geratu da. Bigarren zatian, Bartzelonak emaitza irauli du, Luis Suarezen bi golei esker (2-1).

Alemanian jokatu den beste kanporaketan, Bayernek garaipen estua lortu du Benficaren aurka. Alemaniarrak azkar jarri dira aurretik Arturo Vidalek bigarren minutuan sartutako golari esker (1-0). Bayernek gol gehiago sartzeko abaguneak izan ditu, baina Benficak ere berdintzeko aukerak sortu ditu.