Granerok ezingo ditu hurrengo bi partidak jokatu lesioa dela medio

Esteban Granero Realeko erdilariak orkatila bihurritu zuen igandeko derbian, eta, ondorioz, seguruenik ezingo ditu urte amaierako azken bi partidak jokatu.

Printzipioz, Granero ez da Moyesen hamaikakoan izango hurrengo bi partidetan; ez Oviedoren aurka asteazken honetan jokatuko duten Errege Kopako final-hamaseirenetako partidan, ez Levanteren aurka urte amaieran jokatuko duten Ligako azken partidan.

Madrildarrak sasoi onean jokatu zuen derbia, eta Realeko jokalaririk onenetakoa izan zen. Hala ere, zorte txarra eduki zuen, ezker hankako orkatila bihurritu baitzuen. Klubeko medikuen hitzetan, bigarren graduko lesioa da. Jokalariak errekuperazio lanak hasi ditu jada.

Graneroren lesioak Realean min hartuta dauden jokalarien zerrenda handitzea dakar. Gorka Elustondok eta Joseba Zalduak ere, bigarren graduko bihurdura dute. Mikel Gonzalezek infekzioa du faringean, eta Martinezek gainkarga du izter batean.

Hori horrela, eta aipatu bezala, Moyesek Kopari begira egin du asteleheneko lan-saioa, asteazkenean, 22:00etan, Oviedoren aurka Kopako itzuliko partida jokatuko baitute. Txuri-urdinek badakite hitzordu horretan ezin dutela hutsik egin. Gainera, Realak egonkortasun handia erakutsi ohi du txapelketa honetako azken edizioetan, eta animoa ere indarberritu nahian dabiltza, Levanteren aurkako norgehiagokarako ezin hobeto egon ahal izateko.