Sansek etxetik kanpo puntuak lortu ezinik jarraitzen du

Sansek 1-0 galdu du Burgosen, eta, ondorioz, jaitsierako postuetan jarraituko du beste astebetez Hypermotion Ligako sailkapenean. Burgosen gola David Gonzalezek sartu du, partidaren azken txanpan, penaltiz.

Jon Ansotegiren taldeak lan ona egin du defentsan, baina arrisku gutxi sortu du erasoan, eta pare bat gol aukera baino ez ditu izan neurketa guztian.

Burgos, oro har, hobea izan da, eta gola sartzeko hainbat abagune izan ditu. Talde txuri-urdinak ondo eutsi dio, baina 84. minutuan, Carrerak baloia eskuarekin jo du area barruan, eta epaileak penaltia adierazi du, jokaldia VARean berrikusi eta gero.

David Gonzalezek jaurti du penaltia, eta baloia sarera bidali du. Gol horrek min handia egin dio Sanseri, eta orduan bukatu da norgehiagoka.

Donostiako taldeak 5 partida jokatu ditu etxetik kanpo, eta guztiak galdu ditu. Bolada txarrari amaieran eman ezinda, Sansek jaitsierako postuetan segitzen du, 9 puntu dituela.