Profesionalak ez diren futbol partidak, bertan behera

Espainiako Futbol Federazioko Jarraipen Batzordea gaur goizean bildu da eta Federazio Autonomiko guztiei jakinarazi nahi izan die bertan hartutako erabakiak:

Batzorde Delegatuari hainbat neurriak helaraztea erabaki egin du.

Beraz, Estatuko Futboleko eta Areto-Futboleko profesionalak ez diren partida guztiak bertan behera geratuko dira, hots, Bigarren B Mailatik behera, umeen kategorietara arte. Neurria hurrengo bi asteetarako da.

Euskadiko Futbol Federakundeak erabaki du bertan behera uztea bere eskumenaren menpe dauden lehiaketa txapelketa guztietako partidak, asteazken honetatik bestelakorik esan arte, koronabirusaren bilakaeraren ondorioz.

Zehazki, Hirugarren Mailako, Gazteen Nazional Ligako, Gazteen Euskal Ligako, Kadeteen Euskal Ligako, Emakumeen Euskal Ligako eta Areto Futboleko Hirugarren Mailako eta Euskal Ligako partida geratu dira bertan behera, Euskadiko Futbol Federakundeak prentsa ohar bidez jakinarazi duenez.

Eusko Jaurlaritzak eta Espainiako Futbol Federazioak emandako aholkuak kontutan hartuta, neurri hori hartzea egokiena dela uste du Euskadiko Futbol Federakundeak, eta sor daitezkeen eragozpen eta kalteak sentitu ditu. Halere, "gure pertsona federatuen, zuzendaritza kideen eta zaleen segurtasun eta osasun handiagoa izan dezaten", osasun agintarien gomendioak jarraitzea erabaki du.