Diego Martinezek ez du jarraituko Osasuna entrenatzen

Osasunaren Zuzendaritza Batzordeak asteazken honetan hartu duen erabakiaren arabera, Diego Martinez galiziarra ez da izango talde gorritxoaren entrenatzailea datorren denboraldian, nahiz eta kontratua zeukan 2019ko ekainaren 30era arte.

Batzordeko kideek, Luis Sabalza buru zutela, bilera egin dute arratsaldean, eta bertan Braulio Vazquez kirol-zuzendariaren txostenaren nondik norakoen berri izan dute. Bilera horretatik atera den erabakia Diego Martinezek bere kontratuarekin jarrai ez dezala izan da, besteak beste, ez duelako lortu taldea igoera lortzeko borrokan murgilduta egon zedila.

Martinez joan zen udan heldu zen Osasunara, Sevillaren bigarren taldea zuzendu ostean. Bere aginduetara gorritxoak Lehen Mailarako igoera zuzena ematen duten postuetatik urruti geratu dira, eta ezin izan dute lortu ezta igoerarako promozioa jokatzeko sailkapena ere, azken jardunaldian xede hori erdiestea beren eskura izan arren.

Albiste horren berri ematen zuen webgunean argitaratutako oharraz gain, klubak ez du hartutako erabakiari buruzko zehaztasun gehiago gaineratu. Alabaina, Sabalza eta Braulio prentsaurrekoan agertuko dira ostegun goizean (11:00etan), Sadarren.