Osasunaren hauteskunde-batzordeak Luis Sabalza izendatu du presidente

Osasunaren hauteskunde-batzordeak astelehen arratsalde honetan jakitera eman duenez, ez ditu onartu Juan Ramon Lafon eta Victor Alvarez hautagaiek aurkeztutako helegiteak, aurreko astean batzordeak berak hautagaien banketxetako aurreabalak atzera bota ostean

Hartara, Luis Sabalza hautagai bakartzat jo du batzordeak, eta, horrenbestez presidente izendatu du.

Alvarezek ostiralean adierazi zuen ontzat emango zuela batzordearen erabakia, eta baztertu egin zuen justizia arruntera jotzea. Lafonek, ordea, printzipioz bide hori erabiltzeko asmoa luke.

Sabalza 2014ko abendutik izan da presidente duela egun gutxira arte; izan ere, dimisioa eman zuen hauteskundeetara aurkeztu ahal izateko. Horrenbestez, beste lau urtez jarraituko du karguan.

Aurreikuspenen arabera, asteazkenean edo ostegunean hartuko luke bere kargua, eta, hartara igandean taldeak Alcorconen aurka jokatu behar duen partidan izango litzateke, hau da, hauteskundeak egitekoak ziren egun berean.