Sir Alex Fergusonek Athleticek merezita irabazi duela aitortu du

Sir Alex Ferguson Manchster Unitedeko entrenatzaileak aitortu du ez dutela aitzakiarik eta Athleticek nagusi izan delako pasa duela kanporaketa. Dena den, Fergusoni ez zaio gustatu nola hartu duten lehen gola. "Talde britainiarra izanda, horrelako gol bat hartzea gogorra da", esan du Fergusonek.

"Gola hartu dugun unera arte, partida berdindua izan da. Bigarren zatian, ordea, gu baino gehiago izan dira. Hobeto jokatu dute eta hiru gol aukera oso argi izan dituzte. Baloi jabetzan ere nagusi izan dira. Bigarren gola hartu ondoren ezin izan dugu gehiago egin", gaineratu du Unitedeko entrenatzaileak.

"Athleticek aurrera egiteko aukera bikaina du. Merezita pasa dira eta onena opa diot talde honi. Beraien entrenatzaileak horrela joka arazten die eta horrela jokatzen ikustea txundigarria da. Finaleraino iristea merezi dute", esanez bukatu du prentsa agerraldia Fergusonek.