Athleticeko bazkideek estatutuak lege berriari egokitzea onartu dute

Euskalduna Jauregian burutu den Batzarrean 445 bazkidek eman dute botoa eta horietatik 416k aldeko botoa eman dute. Hamalau ezezko boto egon dira, zortzi boto zuriz eman dira eta zazpi balio gabeak izan dira.

Fernando Garcia Macua Athleticeko presidente zenean estatutuak aldatzeko batzarra egin zen (2011ko apirilaren 11n), baina bazkideek ezekoa eman zioten orduko Zuzendaritza Batzordearen proposamenari.

Javier Aldazabal Zuzendaritza Batzordeko idazkariak bazkideei azaldu dienez, aurreneko erreforma araudi berrira moldatzeko "egokitzapen txiki bat" baino ez da. Hala ere, taldearen "barneko araudiaren kalitatea hobetzeko" aldaketa berri bat planteatuko dutela jakitera eman du Aldazabalek.

"Legeak derrigortutakoa egin da soilik, legeak derrigortutako guztia betetzeko. Zuzendaritza batzordearen ekarpenik ez dago. Estatutu zaharren kopia bat da eta derrigorrez aldatu beharrekoa baino ez da aldatu", azaldu du Aldazabalek.

Berritasunen artean, "zuzendaritza batzordeko erantzukizunen araudi berria, indarrean zegoena baino zorrotzagoa; bazkideen eskubide eta betebeharren zerrendaren berregituraketa, eta indargabetutako araudiak ezabatzea", besteak beste.

Estatutuak aldatzeko prozesua zabaltzea onartu du batzarrak, eta baita egitasmoa idazteko ardura izango duen batzordearen izendapena ere. Besteak beste, "hauteskunde prozedura, bazkideen betebehar eta eskubideak eta diziplina erregimena" aldatu nahi dituzte.