Yeray Swansearen kontra jokatzeko deialdian sartu da

Yeray Alvarez lehen taldeko jokalariak parte hartuko du Athleticek U23 Premier League jokatzeko egingo duen deialdian.

Partida abenduaren 20an, asteazkenean, Swansearen aurka izango da eta lehia Landore Training Ground futbol zelaian jokatuko da.

Beraz, defentsa zuri-gorria prest da berriro ere Athleticen elastikoa janzteko. Txema Añibarrok zuzentzen duen taldea Bilbao Athleticeko, Baskoniako zein Ohorezko Mailan aritzen den taldeko jokalariaz hornitzen da.

Neurketa iluntzeko 20:00etan jokatuko da.

Yeray taldekideekin batera entrenatzen hasi zen aurreko hilean, barrabiletako minbizia gainditu eta ekainetik bajan egon eta gero. Lehen egunetan Xabi Clementerekin batera aritu zen, errekuperazio ariketa batzuk egiten, eta ondoren taldekideen erritmora.