Athletic multzoko azken postuan dago, Genken aurka galdu ostean

Athletic galtzaile atera da ostegun honetan Belgikan KRC Genk taldearen aurka jokatutako partidan. Zuri-gorriek 2 eta 0 galdu dute, eta, ondorioz, etorkizuna ilundu zaie Europa Ligan; izan ere, F multzoko azken postuan daude.

Jacub Brabecek 40. minutuan eta Wilfred Ndidik 83an egindako golei esker irabazi du Genkek norgehiagoka.

Bi gol jaso arren, Iago Herrerin izan da Athleticeko jokalaririk onena, Yeray Alvarezekin batera. Partidako azken minutuetan, atzelari gazteak min hartu du orkatilan, eta Athleticek 10 jokalarirekin amaitu du neurketa.

Aritz Adurizek bi aukera oso argi izan ditu lehen zatian bere taldea aurretik jartzeko, baina donostiarra ez da ohi bezain zuhur ibili. Azkenean, Genkek egin du gola, atsedenaldiaren atarian, Brabecen bidez.

Bigarren zati kaskarra

Zuri-gorriek ez dute hobera egin bigarren zatian. Gainera, Aduriz txartel gorria jasotzeko zorian izan da Buffeli kolpea eman ostean. Ondoren, San Josek eta Susaetak jaurtiketak egin dituzte, baina ez dute asmatu.

Handik gutxira, Ndidik urrutitik jaurti du, eta belgikarren bigarrena egin du horrela. Azkenean, Genk nagusitu da, eta, ondorioz, Athletic F multzoko azken postuan dago orain.

Fitxa teknikoa:

2 - KRC Genk: Bizot; Castagne, Brabec, Colley, Nastic; Susic (Heynen, 78. min), Ndidi, Pozuelo; Bailey, Karelis (Trossard, 84. min) eta Buffel (Samatta, 56. min).

0 - Athletic: Iago Herrerín; Lekue, Yeray, Laporte, Balenziaga (Saborit, 46. min); Iturraspe, San José (Elustondo, 80. min); Williams (Susaeta, 80. min), Raúl García, Muniain; eta Aduriz.

Golak: 1-0, 40. min: Brabec. 2-0, 83. min: Ndidi.