Bidasoa Espainiako Kopako finaletik kanpo geratu da, BM Logroñoren aurka galduta

Bidasoa Espainiako Kopako finaletik kanpo geratu da, BM Logroñoren aurka lehenengo finalerdia 27 eta 28 galduta.

Errioxarrak bolada onean dira, azken zazpi partidak irabazi baitituzte, eta lehenengo minutuetan gipuzkoarrak baino gehiago izan dira.

Kanpoko taldea 4 eta 5 jarri da aurretik lehen 10 minutuetan, eta lehen zatiko lan-erdietarako markagailua 7na zegoen. Bidasoak erritmoa estutu du orduan, eta bi goleko errentarekin iritsi dira atsedenaldira: 14-12.

Bigarren zatian, Logroñoko taldeak 0 eta 2ko partziala egin du partida berriro berdintzeko. Jacobo Cuetarak, egoera ikusita, hutsartea eskatu du bere jokalariei aginduak emateko, Mohamed Aly Logroñokoen jokalaria gelditzeko arazo handiak zituztelako.

Entrenatzaile asturiarraren hitzek eragina izan dute, eta Bidasoa 17 eta 14 aurreratu da. Finalerdia ondo bideratuta zirudien momentu horretan.

Errioxarrek, baina, ez dute amore eman, eta markagailuan berriro aurretik jartzea lortu dute: 21-22.

Amaierarako 40 segundo falta zirenean, Bidasoa gol bat atzetik zegoen (26-27). Gipuzkoarrek presioa egin dute kantxa osoan luzapena behartzeko asmoz, eta helburua lortzear izan dira, baina Xabi Tua jokalariaren golak garaipena eta finalerako txartela eman die errioxarrei: 27-28.

Fitxa teknikoa

27- Bidasoa Irun: Jakub Skryniarz (Harbaoui), Zabala (1), Asier Nieto (1), Tito Díaz (4), Dariel García (1), Gorka Nieto (1), Matheus da Silva, Pacheco (3), Furundarena (1), Julen Mujika (2), Cavero (6, 2 penaltiz.), Esteban Salinas (4), Jevtic, Tao Gey (1), Sladnowski, Asier Iribar (2).

28- BM Logroño Errioxa: Mohamed Aly (Palasics); Zaja (4), David Cadarso (2, 1 penaltiz), Palomino (6), Xavi Tua (1), Alves Ponciano (2), Eduardo Cadarso, Modi (1), Urios (1), Marti Soler (4), El Korchi (2), Preciado (3), Eduardo Ortiz (2).

Epailea: Aritz Zaragüeta eta Raul Oyarzun. Julen Mujika, Pacheco, Rolando Uríos Jr. eta Palomino kaleratu dituzte.

Markagailua, bost minututik bost minutura: 3-3; 4-5; 7-7; 10-9; 13-11; 14-12 (atsedenaldia); 16-14; 18-16; 20-18; 22-23; 24-25; 27-28.