'Argi geratu da berdintasuna agenda politikoaren lehen lerroan dagoela'

'Nire ibilbide politikoan egin dudan gauzarik inportanteena izan zen, dudarik gabe, Euskadiko Berdintasun Legea parlamentura eraman eta onartzea'. Hala mintzatu da Juan Jose Ibarretxe lehendakari ohia Maite Artolak 'Faktorian' egin dion gertuko elkarrizketan. Ultraeskuinaren erasoaldien aurrean, baikor da, erakusten duelako gai hori agenda politikoaren lehen lerroan dagoela'.  'konturatu garelako', erantsi du, 'lortutakoa ez daukagula ziurtatuta eta aurrera jarraitu behar dugula bide horretan'. Ildo horretan uste du atzerabueltarik gabekoa dela gizon eta emakumeen arteko berdintasuna. 'Etorkizuna, berdinasuna da', esan du: 'Ez dago etorkizunik berdintasunean sakontzen ez badugu'. Bere iritziz, balore zerrendan lehen lerroan jarri behar da berdintasuna eta herri bezala ildo horretan erreferentzialtasuna bilatu, euskal gizartea munduan eredu izan dadin.

Berdintasunaren  ezinbestekotzat jo du gizonen inplikazioa. 'Emakumeok egin duzuen lanari esker heldu gara honaino. Baina ezinezkoa da hemendik aurrera, berdintasunaren bidean aurrera egitea, gizonak inplikatzen ez bagara'.  Hitz egin behar da, diskurtsoa barneratu eta sinistu gero, eta batez ere, ekintzetara pasa. Eta horretan ari da bera, ama nagusiaren zaintzaile lanetan. 'Orain, zaintzaile, erizain eta semea naiz aldi berean. Eta ikasten ari naiz asko. Gogorra da baina ikasbide zoragarria. Egunkariak irakurtzen dizkiot, filmak ikusten ditugu -azkena, Tiburón 1- eta zineforuma egiten, pardela aldatzen diot... Gogorra da. Baina ederra', kontatu du.

'Gizonok', jarraitu du, 'anputatuta izan dugu arlo afektiboa'. Jabetza horretatik erabaki zuen alde afektibo hori zaintzaren bitartez errekuperatzea: 'Aurkikuntza bat izan da'. Bera bezala gero eta gizon inplikatu gehiago dagoela gogorazi du, baina dei egin die hala ez daudenei urratsa eman dezaten. 'Gurasoekin egotea ondo daudenean polita da; baina gaizki daudenean, aberasgarriagoa', iritzi dio. Eta hortik ondorengo gogoeta: 'Ezagutzen ez duzuna maitatzea ezinezkoa da".