Irene Etxeberria: "Garunetik ateratzen diren prozesu psikologikoak aztertzen ditugu"

Irene Etxeberriak argi zuen neurozientzia ikasi nahi zuela eta zehazki, neurozientzia kognitiboan aritu nahi zuela. Horretarako, eskola amaitu eta Erresuma Batura joan zen unibertsitate ikasketak egitera. Urte bete Parisen egin ostean, duela hiru urte abiatu zuen doktoretza Oxfordeko Unibertsitatean. Neurozientzia kognitiboak psikologia eta neurozientzia uztartzen dituela azaldu digu Irene Etxeberriak, zehazki, "garunetik ateratzen diren prozesu psikologikoak aztertzen ditugu".

Duela gutxi SRUKeko (Spanish Researchers in the United Kingdom) zuzendaria egin dute, eta bertan dituen eginkizunei buruz aritu zaigu. Besteak beste, esan digu, Euskal Herrira itzultzeko aukerak eta Brexita direla ikerlari askok dituzten kezkak, eta kezka horiei bide ematen saiatzen direla elkartean.