Lotsaren paperak

'Panamako paperen' auziak hainbat zalantza moral, legal eta ekonomiko azalarazi ditu. Kontuan hartu behar da dirua atzerrian izatea, berez, ez dela legez kontrakoa; beti ere, Ogasunaren aurrean aitortuz gero, eta diru-kontu horrek eragiten dituen etekinengatik ordainduz gero. Gertatzen dena da, kasu askotan, atzerriko kontu hori dirua zuritzeko erabiltzen dena, zergei ihes egiteko ere bai, edo bi gauzetarako.

Zerga-paradisuetan badira enpresak paradisu batetik bestera dirua mugitzeko azpiegiturak sortzen espezialistak direnak, eta titularrei izen faltsuak ematen dizkietenak; azken finean, diru-kontuen benetako jabeek jatorrizko herrialdeetan ordaindu beharreko zergei ihes egin diezaieten. Eta zerga-paradisu asko daude. Panama, adibidez, zerga-paradisuen zerrenda beltzetik atera zen orain urte batzuk. Tira, ba Panaman horrelako gauzak egin izan badituzte, pentsa zer egingo duten zerrenda beltz horretan jarraitzen duten zerga-paradisuetan.

Zerga-paradisuetan ezkutatzen den diruak munduko arazo handienetako asko konponduko lituzke. Bada garaia nazioarte-mailako ekintza koordinatua antolatzeko zerga-paradisu fiskal horiek ito ahal izateko. Aprobetxatu beharra dago 'Panamako paperek' eragin duten zirrara.