Nafarroako Kutxaren Fundaziotik 157 artelan desagertu dira

Nafarroako Kutxaren Fundaziotik 157 artelan desagertu direla salatu du Kontuz elkarteak.

Patxi Zamora bozeramaileak esan duenez, "kezka handia piztu da, obra horien egileek artelanak fundazioaren esku zeudela uste zutelako eta orain non dauden ez dakitelako".

Nafarroako Kutxaren Fundazioa 640 obraren jabe da, baina publiko egin duen zerrendan 157 artelan falta direla jakinarazi du Kontuzek. Horietako 75ek ez zuten erosketa-baliorik edo egileek doan emandakoak dira.

Gainerako 82engatik, berriz, Nafarroako Kutxak 95.482 euro ordaindu zituen. "Fundazioak publiko egindako zerrendan hiru motako zifra kodeak agertzen dira, hurrenez hurren, baina 748 zenbaki falta direla egiaztatu dugu eta 2011 baino lehen desagertutako beste artelan batzuk izan daitezkeela uste dugu".

Aipatu dokumentuak "zalantza ugari" sortu dituela azpimarratu du, eta Nafarroako Kutxako Fundazioko arduradunek gertatutakoa argitu beharko dutela esan du.

Kontuzen arabera, Miguel Sanz Nafarroako Gobernuko presidente ohiak eta Jose Antonio Asiainek (Nafarroako Kutxako erantzuleak garai hartan) eta Yolanda Barcinak (Nafarroako Kutxaren kontrolerako batzordeko presidentea) ere azalpenak eman beharko dituzte.