Espainiako defizita % 10,6koa da, Europar Batasuneko altuena

Espainiako defizit publikoa Barne Produktu Gordinaren % 10,6koa izan da 2012an, banketxeei emandako laguntzak kontuan hartuta, Eurostat Europako Erkidegoko Estatistika Bulegoaren datuen arabera.

Bankuen laguntzak kontuan hartuta, Europar Batasuneko defizit maila altuena izan du Espainiak 2012an, Greziaren (BPGaren % 10), Irlandaren (% 7,6) eta Portugalen (% 6,4) aurretik.

% 3,7ko defizita eurogunean eta % 4koa Batasunean

Euroguneko defizita % 3,7koa izan da 2012an eta Europar Batasunekoa BPGaren % 4koa. Era horretan, beherakada izan da bi kasuetan.

Iaz, euroguneko defizita Barne Produktu Gordinaren % 4,2koa izan zen eta Europar Batasunean % 4,4koa.

Bestalde, zor publikoa 3,3 puntu igo da moneta bakarra duten herrialdeen artean. 2011n, BPGaren % 87,3koa izan zen; 2012an, berriz, % 90,6koa izan da. Europar Batasunean ere hazi egin da, 2,8 puntu hain zuzen.

2012ko defizit baxuenak Estonian (BPGaren % 0,3), Suedian (% 0,5), Bulgarian eta Luxenburgon (% 0,8 bi kasuetan) eta Letonian (% 1,2) izan dira.

Europar Batasuneko 17 herrialde daude Egonkortasun eta Hazkunde Itunak (PEC) ezarritako % 3ko mugaren gainetik.

Europar Batasuneko 17 herrialde daude Egonkortasun eta Hazkunde Itunak (PEC) ezarritako % 3ko mugaren gainetik: Espainia (% 10,6), Grezia (% 10), Irlanda (% 7,6), Portugal (% 6,4), Zipre eta Erresuma Batua (% 6,3), Frantzia (% 4,8), Txekia (% 4,4), Eslovakia (% 4,3), Herbehereak (% 4,1), Danimarka eta Eslovenia (% 4), Belgika eta Polonia (% 3,9), Malta (% 3,3), Lituania (% 3,2) eta Italia (% 3).