Prestaketa

Berdela garbitu, solomoak atera, pintza batzuen laguntzarekin hezur guztiak kendu eta jarraian laukitan zatituko dugu. Gatzez ondu eta geroko gorde.

Lapiko bat urarekin sutan jarriko dugu eta irakiten hasten denean, ganbak minutu batez galdarraztatuko ditugu. Segituan ur hotzetan hoztu, zuritu eta lau bat zatitan moztuko dugu bakoitza. Geroko gorde.

Tipuleta gorriaren kanpoko hiru geruzak hartu eta juliana eran zatitu. Arrainari erantsi eta ganbak ere bertara gehitu.

Cancha-artoa frijitzeko, lapiko batean ekilore olioa jarriko dugu eta bertan sartuko dugu artoa. Tapa ipini eta sutan jarriko dugu. Artoak urre kolore polit bat hartu arte, uneoro tapa kendu eta mugitzen joango gara. Artoa gorritu eta erditik irekitzen denean, eginda egongo da. Sukaldeko papera izango duen plater batera atera eta gatz pixka bat gehitu gainetik.

Choclo-artoa uretan egosiko dugu. Horretarako lapiko batean urarekin jarriko dugu eta irakiten hasten den une beretik hasita, 6 minutuz egosi eta gero kanpora aterako ditugu hoztera.

Tigre-esnea egiteko, lima zukua berakatz txikituarekin, jengibre birrinduarekin eta martorri adarrekin katilu batean jarriko dugu. Ordubete pasatu ondoren, iragazi eta gatza eta aji hori pasta gehituko dizkiogu.

Berdela, kipula, ganbak eta artoak lima eta limoi zukuarekin nahasi. Jarraian martorri txikitua gehitu eta tigre esnearekin lagunduta zerbitzatu.