Prestaketa

Patata gordina, birringailuarekin, trapu baten gainean birrindu eta trapuarekin bildu ondoren, ondo estutu, eta ahal dugun ur guztia kenduko diogu. Jarraian, patata egosi purearekin, irinarekin, gatzarekin eta piperbeltzarekin nahasi, eta hagaxka baten laguntzarekin nahasi bitartean, esnea gehitzen joango gara. Bexamel baten antzeko ore krematsu bat lortzen dugunean, sukaldeko plastikoarekin bildu, eta pausatzen utziko dugu ordu erdiz.

Betegarri gazia egiteko, tipuleta txiki-txiki moztu, eta erregosten jarri zartagin batean olio pixka batekin. Sagarra zuritu, laukitxotan moztu, eta, tipula erregosiarekin batera, minutu batzuez salteatu. Atera odolkiaren haragia, eta nahasi zartaginean dugunarekin sutatik kanpo. Gorde beroa geroko.

Betegarri gozoa egiteko, moztu sagarra laukitan, eta salteatu pare bat minutuz zartagin batean eztiarekin. Jarraian, zukua eta kanela gehitu, sua jaitsi, eta utzi konpota sutan, poliki-poliki, likido guztia lurrundu eta sagarrak bigundu arte.

Boxty-ak egiteko, zartagin bat, su ertainean, gurin pixka batekin jarriko dugu, eta burruntzalikada bat patata ore botako dugu bertara. Jarraian, krepe lodi bat balitz bezala zabaldu, eta bi minutuz, alde batetik egiten utziko dugu; buelta eman, eta beste aldetik beste bi minutuz egiten utziko dugu. Eginda dagoenean, atera, eta gainerakoak egiten joan. Eginda daudenean, gure talo bat balitz bezala, zerbitzatu betegarri ezberdinak barruan sarturik.