Prestaketa

Olo-orea egiteko oloa beratzen jarri. Ura irakin eta ontzi sakon batean oloari gehitu ondoren, ordubete beratzen utzi. Denbora horren ondoren, gatzez ondu, pinaziak, usain-belarrak eta piperbeltza gehitu eta ongi oratu. Hozkailuan gorde.

Barrengorri duxelle-a egin. Tipulatxak zuritu eta xehe-xehe moztu ondoren, zartagin batean gurinarekin eta oliba olioarekin erregosten jarri. Barrengorriei lurra kendu ostean, sukaldeko robotean birrindu. Barrengorriak tipulatxari gehitu eta gatzez ondu ondoren, 2-3 minutuz su bizian erregosi. Pattarra gehitu eta murrizten utzi. Esne-gaina eta perrexil xehatua gehitu, eta berriro ere murrizten utzi, pasta moduko bat egiten den arte.

Kuiatxoak mandolinan fin-fin xerratu.

Labea 180 °Can berotzen jarri, goitik eta behetik. Labeko erretilu bat plastiko filmarekin forratu (ertzetatik kanpora plastiko zati eder bat utziz) eta kuiatxo xerrekin dena estali (bigarren geruzarako kuiatxo xerrak gorde). Kuiatxoen gainean olo-orea zabaldu, izkina guztiak ongi betez. Bigarren kuiatxo geruza jarri. Barrengorri duxelle geruza zabaldu. Erretiluaren alde batean goitik beherantz mozzarela mamurtua zabaldu, esan bezala, bertikalean. Mozzarela dagoen aldetik plastiko filmari tiratuz biribilki bat egin. Plastikoa kendu eta poliki-poliki paper sulfatatuarekin forratua edukiko dugun erretiluaren gainean jarri. Oliba olio txorrotada on bat gehitu, gainetik gatz apur bat bota eta 15 minutuz laberatu. Labetik atera, emmental gazta gainetik bota eta gainerretzeko aukera programatu ondoren, gazta gorritzen den arte laberatu.

Entsalada prestatu. Katilu batean ozpin-olioaren osagai guztiak hagaxkarekin nahasi. Ontzi sakon batean eskarola, sesamo haziak eta ogi koxkorrak jarri eta ozpin-olioarekin gozatu.

Barazki biribilkia labetik atera, medailoi zabaletan moztu eta entsaladarekin zerbitzatu.