Prestaketa

Lehen hartzigarria

Legamia uretan disolbatzen hasiko gara. Ondoren, ontzi sakon batean irina eta azukrea nahasi, eta legamiaren nahaskia gehitu. Azkenik, orearekin bola bat egin, ontzia plastiko filmarekin estali eta tamainaz bikoizten den arte pausatzen utzi.

Orea

Lehen hartzidurako bolatxoa bikoizten denean hasiko gara bigarren pausuarekin. Ontzi sakon batera irina bahetu, azukrea eta gatza gehitu eta nahasi. Segidan, legamia esnetan desegin. Eskuekin erdian zulo bat egin eta arrautzaren gorringoak eta esnea legamiarekin gehituko ditugu. Guztia eskuekin bildu eta oratu.

Ondoren, orea mahai gainera atera, zabaldu eta gurina erantsi. Atzera berriz orea bildu eta guztia ongi integratzen den arte oratu. Hasieran zaila egingo zaigu, baina pazientzia izan, dena ongi bilduko da-eta. Orea uniforme eta leuna dagoenean, bola forma eman, ontzi batean sartu eta trapu batekin estalirik tamainaz bikoizten den arte pausatzen utzi.

Oreari forma eman

Tamainaz bikoizten denean, gurina urtu eta pintzel baten laguntzarekin orearen gainaldea margotuko dugu. Ondoren, txokolate pinportak eta intxaurrak zabaldu eta ertz batetik hasita orea biribildu. Labana baten laguntzarekin ore-biribilkia luzeran ebaki. Bi zatiekin txirikorda bat egin eta jarraian, aingeruaren koroa bailitzan zilindro forma eman. Azkenik, hirugarren hartzidura emateko, labeko erretilu batean jarri (paper sulfurizatuarekin forratu ondoren), trapu batekin estali eta 20-25 minutuz pausatzen utzi.

Laberatu

Labea goitik eta behetik 180 gradutan berotuko dugu. Aingeru pastela 40 minutuz laberatu.

Egosketaren erdian gehiegi gorritzen ari dela ikusiko bagenu, labea ireki eta aluminio-papera jar diezaiokegu gainean. Berriro labea itxi eta falta zaion egosketa emango genioke. Egiten denean, labetik atera eta hezetasuna saiheste aldera, parrilla baten gainean hozten utzi.

Glasatua

Azukre hautsa eta arrautza-zuringoa hagaxkekin arin-arin harrotu, merengea egin gabe. Aingeru koroa hoztu denean, gainetik glasatuarekin bustiko dugu.