Prestaketa

Ogi mamiak:

Ogia mamitu eta ontzi batean sartu. Ardo zuriaren tanta batzuk bota eta erreserbatu. Tipulina txikitu eta zartagin batean erregosten jarri olioarekin. Bertara hirugiharra eta urdaiazpikoa txikituta gehitu eta sueztitzen utzi koipea galdu dezaten. Orduan ogi mamiak bota eta sueztitzen jarraitu mamiak kanpotik kurruskariak eta barrutik xamurrak geratu arte.

Barazki erreak:

Barazkiak labean sartu 190 ºC-an 30 minutuz. Hozten utzi eta zuritu ondoren, juliana eran moztu eta nahastu gatza eta olioa botata.

Piper gorri emultsioa:

Piper gorria labean erre eta zuritu. Zartagin batean txorrotada bat olio bota eta baratxuri alea xerratuta gorritzen jarri. Bertara piper gorria bota, erregosi eta ontziratu. Birringailuarekin txikitzen hasi eta birrintzen goazen eran olioa bota, emultsio bat sortu arte. Gatza jarri.

Hirugiharra eta urdaiazpikoa xaflatan moztu.

BUKAERA:

Plater batean ogi mamiak luzatu eta alde batean barazki erreak jarri. Ingurutik piper gorri emultsioa bota eta mamien gainean hirugihar eta urdaiazpiko xaflak jarri, eta arrautzak frijituta.