Pello Bilbaok Down Under Tourreko hirugarren etapa bereganatu du

Bahrain Victorious taldeko Pello Bilbao (Bahrain Victorious) bizkaitarrak (Gernika, 1990) irabazi du ostiral honetan jokatu den Down Under Tourreko hirugarren etapa. Bere aldetik, Jay Vine (UAE Emirates) australiarra da sailkapen nagusiko lider berria.

Gernikarra adi egon da Vinek Corkscrewko igoera gogorrean (% 13ko batez besteko maldak) erasora jo duenean, eta harekin eta Simon Yates britainiarrarekin (Jayco-Alula) batera ihes egin du, Rohan Dennis (Jumbo-Visma) liderra atzean utzita.

UAEko txirrindularia asmo handiz aritu da lanean, bere herrikide Denisen liderraren elastikoa bereganatzeko asmoz, eta bere bi iheskideen laguntza aurkitu du. Horri esker, euren artean jokatu dute etaparen garaipena. Jardun horretan, Bilbao izan da azkarrena azken esprintean Yates baino ahaltsuago agertuta. Vine, berriz, hirugarren tokian sartu da, baina lidertza eskuratzearen saria lortu du.

Gaur garaipena profesionaletan erdiesten duen hamabosgarrena da Bilbaorentzat, eta, bide batez, sailkapen nagusiko bigarren tokira jauzi egiteko balio izan dio. Une honetan Vinerengandik 15 segundora dago, lasterketaren probaren laugarren etapari ekin aurretik (135 kilometro).

"Yates eta Vinerekin bat egiteko zailtasunak izan ditut. Nire onena eman behar izan dut, igoeraren azken 300 metroetan haiekin bat egiteko. Banekien aukera ona izango nuela, eurak ere sailkapen nagusiaren bila zebiltzalako. Ni, aldiz, nire esprint onena egitera eta irabazten saiatzera atera naiz", azaldu du gernikarrak garaipenaren ostean.