Froome: 'Asma dut eta oso ondo ezagutzen ditut arauak'

Chris Froome txirrindulariaren positiboa ezagutu bezain pronto jakin da britainiarraren iritzia eta erantzuna. 'Baimendutako mugak zeintzuk diren badakit eta medikuak gomendatuta hartu nuen salbutamola' esan du britainiarrak.

UCI Txirrindularitzaren Nazioarteko Batasunak prentsa ohar baten bitartez gaur iragarri duen bezala 2017ko Espainiako Vueltan egindako analisian salbutamolezko ezohiko neurriak aurkitu zioten Froome txirrindulariari.

'UCIk analisiaren emaitzak aztertzeko arrazoi osoa du, baina SKY taldearekin batera eman beharreko informazio guztia eskainiko dut. Salbutamola erabiltzeak ez du esan nahi arauak ez ditugula bete, baina bai azalpenak eman behar ditugula jakinarazteko zergatik eman nuen kontzentrazio hain altua', adierazi du Froomek.

'Denok dakigu asma dudala eta baita oso ondo ezagutzen ditudala arauak. Inhalagailu bat erabiltzen dut beti, eta jakin badakit frogak egingo dizkidatela beti liderraren elastikoa eramaten dudan bitartean. Vueltan asmako arazoak larritu ziren eta medikuaren gomendiorekin dosia handitu nuen, baina baimendutako dosia', gehitu du Sky taldeko gizonak.