Bidaideakek Kopako finalerdietarako txartela eskuratu du

Bidaideak BSR taldeak aulkidun saskibaloiko Errege Kopako finalerdietarako txartela lortu du, ostiral honetan, otsailaren 23an, final-laurdenetan Econy Kanaria Handia menderatuta (62-78).

Lehen zatia parekatua izan da. Estreinako laurdenean nagusi izan da Bidaideak, nahiz eta Bilboko taldeak ezin izan duen abantaila handia eskuratu (14-19). Bigarren laurdenean hobetu egin du Kanaria Handiak, desabantaila murriztu du, eta markagailuan aurretik jarri ere bai. Parekotasuna itzela izan da, eta lehia berdinduta heldu da atsedenaldira (38-38).

Atsedenaldiaren ostean, Bidaideakek bikain ekin dio hirugrren laurdenari. Bilboko taldeak zuloa ireki du markagailuan (40-46), aurkaria baino gehiago izan da, eta zortzi puntuko errentarekin iritsi da amaierako hamar minutuetara (48-56).

Gainera, azken laurdenean, erabat kontrolpean izan du neurketa BIdaideakek. Ondo kudeatu du abantaila, eta, horrez gain, errenta handitzea ere lortu du. Azkenean, Bidaideak garaile, 62-78ko emaitzarekin.