Itziar Ariztimuñok beste denboraldi batez jarraituko du Lointek Gernikan

Lointek Gernika Bizkaiak denboraldi batez berritu dio kontratua Itziar Ariztimuño antolatzaile bilbotarrari.

24 urteko jokalariak zortzigarren denboraldia beteko du Lointek Gernikan, azken sasoian batez beste 3,4 puntu, 2,4 errebote eta 2,2 asistentzia lortu ondoren. Mario Lopez entrenatzaile izango duen proiektu berrirako konfirmatutako lehen jokalaria da.

"Oso pozik nago. Aurrera egiten jarraitu nahi dut eta nire onena ematen saiatu, taldeari laguntzeko. Beti da zaila orain arte lortutakoa berdintzea, baina saiatuko gara", azpimarratu du Ariztimuñok klubak zabaldutako oharrean.

Azken asteetan, Lointek Gernikak jakinarazi du Laura Spreafico italiarrak, Sandra Ygueravide valentziarrak eta Patricia Bura eta Andrijana Cvitkovic kroaziarrek ez dutela taldean jarraituko datorren denboraldiari begira.