Anadolu Efesek Real Madril garaitu eta bigarren aldiz jarraian irabazi du Euroliga (57-58)

Anadolu Efesek bere bigarren Euroliga kateatu du, Real Madril lehia ezin estuagoan mendean hartuta (57-58).

Hala, Pablo Laso gasteiztarrak entrenatutako talde madrildarrari azken hatsean egin dio ihes bere hamaikagarren titulua tentsioz betetako berrogei minuturen ostean, nahiz eta finala kontrolpean izan duen ia zatirik gehienean.

Lehen zatian nagusi izan ondoren, eta azken laurdenera aurretik iritsi eta gero, talde zuriak amore eman behar izan du Turkiako taldearen aurka. Atamanenek buelta eman diote lehiari, eta bere erasoak hobeto kudeatzen jakin dute, Vasilije Micicek gidatuta (23 puntu). Gainera, Tibor Pleissek laguntza aparta eskaini dio 19 puntu sartu (horietatik hamar azken hamar minutuetan) eta zazpi errebote eskuratuta.

Fitxa teknikoa:

57 - Real Madril (15+19+8+15): Abalde (2), Hanga (5), Deck (5), Yabusele (3) eta Tavares (14) -hasierako bostekoa-, Causeur (3), Randolph (6), Poirier (5), Rudy (2), Llull (9) eta Taylor (3).

58 - Anadolu Efes (14+15+11+18): Larkin (10), Micic (23), Moermann (-), Anderson (-) eta Pleiss (19) -hasierako bostekoa-, Bryant (-), Singleton (4), Dunston (2) eta Beaubois (-).

Epaileak: Luigi Lamonica, Borys Ryzhyk eta Gytis Vilius. Ez dute inor kanporatu.

Gertakariak: 2021-2022 Euroligako finala, Belgradeko Stark Arenan jokatutakoa 15.000 ikusleren aurrean.