Kosner Baskoniak galdu egin du Zalgirisen aurka, laugarren laurdeneko gainbeherak eraginda

Kosner Baskoniak 82-67 galdu du asteartean, Zalgiris Kaunasi egindako bisitan, Euroligako fase erregularreko 13. jardunaldian. Etxeko taldeak neurketa irauli du azken txanpan, besteak beste, Sylvain Francisco jokalari frantziarraren lanari esker. 

Zalgirio Arenan, baskoniarrak partida menperatzen hasi dira, eta 2-10eko partziala egin; ondoren, abantaila areagotu dute, lehen laurdena amaitzeko 01:09 minutu geratzen zirenean (12-24). Dena den, Ignas Brazdeikisek eta Maodo Lôk sartutako hirukoek egoera apur bat arindu zuten Lituaniako taldearentzat.

Bigarren laurdenaren hasieran, Franciscoren eta Luwawu-Cabarroten arteko lehiak indarrean jarraitu du erasoan, baina Gasteizko taldeko lanak markagailuko aldeari eutsi dio. Hala, 37-42 iritsi dira atsedenaldira. Ordura arte, ez dute faltan bota Markus Howard, bezperako entrenamenduan buruan eta aurpegian hartutako kolpe baten ondorioz baja izan dena.

Hirugarren laurdenean, Zalgirisek erasoan aurrera egin duenez, berdintuta bukatu dute: 54-54. Azken laurdenari begira, Tomas Masiulisen jokalariek partidaren agintea bereganatu dute, eta Baskoniak ezin izan du erantzun. Gainera, Franciscok are gehiago jaso du Zalgiris, minutu gutxitan aldeko 10 puntu baino gehiago eskuratuta (69-59).

Azkenik, Tubelisek eta Ulanovasek saskiratutako hirukoek etxekoen garaipena berretsi dute. Horrenbestez, sailkapenaren bosgarren lekuan dago Lituaniako taldea; Galbiatiren gizonek, aldiz, sailkapenaren beheko aldean jarraitzen dute (17.).