Adam Smithek Bilbao Basketekin berritu du, 2023-24 denboraldirako

Adam Smithek denboraldi baterako berritu du Bilbao Basketekin, 2023-24 denboraldiko amaierara arte, Bilboko klubak asteazkenean jakitera eman duenez. 30 urteko eskolta 2022ko irailean iritsi zen taldera, eta bertan eman duen lehen denboraldian, batez beste, 14,2 puntu sartu ditu, eta 3,1 asistentzia eman. Endesa Ligan, Basquet Manresako Jerrick Hardingek soilik egin ditu berak baino puntu gehiago.

"Kantxan, haren elektrizitateak eta talentuak lagunduko diote taldeari, helburuak gauzatu ahal izateko; kantxatik at, haren adiskidetasunak eta lan egiteko grinak taldea egiten lagunduko dute", nabarmendu du Bilbao Basketek.

Smith, 1,85ekoa bera, Hapoel Holon Israelgo taldetik iritsi zen, Andrew Goudelocken ordez, azken hori lesionatuta baitzegoen.