Goudelock, Kyser, Radicevic, Francis Alonso eta Ubal jokalariek ez dute Bilbao Basketen jarraituko

Andrew Goudelock, Michale Kyser, Nikola Radicevic, Francis Alonso eta Agustin Ubal jokalariek Bilbao Basket utziko dute, klubak berak astearte honetan aditzera emandakoaren arabera.

Goudelock hegalekoak min hartuta eman du denboraldi osoa; Kayser pibotari, Radicevic joko-antolatzaileari eta Francis Alonso hegalekoari dagokienez, kontratua amaitu zaie. Ubali, berriz, "Bartzelonak utzita jokatzeko denbora amaitu zaio".

Goudelock aurreko denboralditik aritu da taldean, eta beste laurek denboraldi bakarra egin dute Bilbon.

Baja horien berri eman ostean, Ludde Hakanson joko-antolatzailearen, Adam Smith hegalekoaren eta Jeff Withey pibotaren etorkizuna zein izango den jakitea falta da. Hiru horiek denboraldiko jokalaririk onenak izan dira talde bizkaitarrean. Xabi Rabaseda eta Alex Reyes hegalekoen etorkizuna ere argitzeko dago.

Egoera berean daude Tomeu Rigo hegalekoa eta Ignacio Rosa hegaleko pibota. Bi horiek minutu gutxi jokatu dituzte, errotazioak baliatzeko gehienbat.