Jaka-Zabaleta bikoteak lidertzan amaitu du lehen itzulia

Bukatu da jada Binakako Txapelketako lehen itzulia, eta zazpi jardunaldi jokatuta, Jaka eta Zabaleta bikotea daude sailkapenaren gorenean, sei garaipen lortuta. Jaka-Zabaleta bikotea aise nagusitu zen Artolaren eta Imazen aurka (22-10) 7. jardunaldian, eta lidertza sendotu zuen.

Garaipen bat gutxiagorekin, bostekin, bigarren postuan daude Altuna eta Galarza, jardunaldi honetan Bengoetxea VI.a-Mariezkurrena bikotea mendean hartu ostean (22-14).

Ezkurdia eta Martija hirugarren postura igo dira, 7. jardunaldia itxi duen norgehiagokan Olaizola II.aren eta Urrutikoetxearen aurka garaipena erdietsita (22-13). Tanteoagatik gainditu dituzte laugarren diren Artola eta Imaz.

Bosgarren dira Laso eta Albisu, seigarren postuan dauden Irribarria-Rezusta bikotearen kontrako neurketa irabazi (22-20) ostean. Bi bikote hauek hiruna garaipen dituzte. Zazpigarren dira Olaizola II.a eta Urrutikoetxea bi partida soilik irabazita.

Azken postuan dagoen bikotea da Bengoetxea VI.ak eta Mariezkurrenak osatzen dutena, zazpi jardunalditan garaipen bakarra eskuratuta.