Bera Berak ez du Txapeldunen Ligako atarikoa antolatuko

Super Amara Bera Berak uko egin dio Txapeldunen Ligako lehen multzoari dagokion sailkatze fasea antolatzeari (bertan sartuta dago Donostiako taldea), eta, azkenerako Poloniako Lublin hiria izango da kanporaketa hori hartuko duena irailaren 8an eta 9an.

Alemaniako Bietigheim izango dute gipuzkoarrek finalerdietan larunbatean eta bestean bertako MKS Lublin taldeak Italiako Jomi Salerno hartuko du. Irabazleek, irailaren 9an, igandean, Txapeldunen Ligako D multzora sailkatzeko lehia jokoan izango dute, non Errumaniako Bucaresti, Norvegiako Vipers Kristiansand eta Hungariako FTC taldeak zain diren. Aitzitik, galtzaileek EHF Cupeko hirugarren kanporaketara zuzenean pasatzea izango dute helburu, azaroan burutuko dena.

Sailkatze fasea antolatzeko lehentasuna izan arren, Bera Berak ez du bere gain hartu ardura hori, hura aurrera ateratzeko egin beharreko ahalegin ekonomiko handia dela-eta.