Maialen Chourraut: "Egunero egin behar da lan hobetzea lortzeko"

Maialen Chourrautek hiru urte barru Parisen egingo diren Joko Olinpikoetan du begirada dagoeneko, eta "pixkanaka" hasi da entrenatzen.

Iazko udan Tokioko Jokoetan ur bizietan zilarrezko domina irabazi zuen. Horrez gain, urrea lortu zuen 2016an Rion eta brontzea 2012an Londresen. Radio Euskadiko "Boulevard" saiotik igaro da, Irungo Zabalgune Plazako Kioskoan.

Chourrautek gogora ekarri duenez, 11 urterekin heldu zen piraguismoaren mundura, Aldundiak Kontxako hondartzan antolatu zituen udako ikastaroei esker. Ikastaroak egiten urte gutxi batzuk eman ondoren, Club Atlético San Sebastián-en eslalom sailean amaitu zuen "eslalom zer zen jakin gabe, ibaia zer zen jakin gabe... erabat ezezaguna zen mundu batean sartu nintzen".

Piraguistak dioenez, ez zuen inoiz pentsatu kirol honetan aritzea, eta kiroletik bizitzeko emaitzak izan behar direla onartzen du: "Emaitzarik gabe ez dago diru-sarrerarik". Hala ere, berak beti saiatu da "egunero hobetzen eta hobekuntza horretan lan egitea, erronka bati begira lan egiten", eta horrela lortu du emaitzak iristea eta piraguismotik bizitzea.

Bere senarra ere entrenatzaile izateak "24 orduz piraguismoa arnastea eragin du", eta elkarrizketetan atera dituzte beti "hurrengo eguneko lanerako pistak". Horrek arlo askotan hobera egitea eragin duela dio.

2012ko Londresen brontzezko domina lortu zuen, eta, nahiz eta urretik "hasperen batera" geratu, brontzea eslalom taldeak Joko batzuetan lortzen zuen lehen domina izan zen.

2016ko Rioko Jokoei dagokienez, "Joko batzuk irabazteko gosez" jarraitzen zuela gogoratu du, "baina 29 urte nituen eta ama izan nahi nuen", adierazi du. Beraz, "urre bat lortzeko amets egin eta gure alaba gehien gustatzen zitzaigun moduan hezteko abenturan" sartu ziren.

Ane 2013an jaio zen eta 2014an Maialenek Munduko Kopa irabazi zuen, 2015ean Europako txapeldun izan zen bakarka eta 2016an Rio iritsi zen. Nahiz eta sailkapenak oso gogorrak izan eta "justu" sailkatu, finalerdian sartu zen 10 onenekin eta gero finalera iritsi zen. "Emaitza ikaragarria izan zen, bi neska gehiago geratu ziren jaisteko, baina banekien txapeldun olinpikoa nintzela eta ospakizuna hasi zen", gogoratu du.

Azkenik, Maialen Chourrautek Tokioko jokoak pandemia betean nola prestatu zituzten gogorarazi du.