Eskalatzaileentzako ibilbide aproposa izango du 2016ko Vueltak

Unipublic enpresak 2016ko Espainiako Itzuliko ibilbidearen aurkezpen ofiziala egin du. Lasterketa abuztuaren 20an hasiko da, Ourensen, eta irailaren 11n amaitu, Madrilen. Lasterketa gogorra egituratu dute, eta lehen bi asteetan erritmoa bizia izango da.

Hamar etapatan, helmugak goian egongo dira, Ezaroko begiratokia, Campeona, Covadongako Lakuak, Peña Cabarga edota Aitanako gaina bezalako tokietan, besteak beste. Azpimarratzekoa da etapa horietako bat Aubisque Frantziako Tourreko mendate ospetsuan amaituko dela.

Guztira, 3.200 kilometro baino gehiago egingo dituzte Madrilera iritsi aurretik. Ibilbidearen zatirik handiena penintsulako iparraldetik, Galiziatik batez ere, eta Valentziatik doa.

Bi erlojupeko egongo dira, bat taldekakoa eta bestea banakakoa. Mendi ertaineko 12 etapa daude, eta lauak direnen artean ere bik helmuga aldapan gora dute, eskalatzaileen mesederako.

Espainiako Itzuliko 21 etapak