2025eko Frantziako Tourraren 15. etaparen profila, ibilbidea eta ordutegia: Muret-Carcasona (169,3 km)

Mendi ertaineko etapa batek emango dio amaiera, igandean, uztailaren 20an, 2025eko Frantziako Tourreko bigarren asteari, 112. ekitaldiko bigarren eta azken atseden egunaren bezperan. Hamabosgarren etapa Mureten hasi eta, 169,3 kilometroko ibilbidea eginda, Carcasonan amaituko da; antolatzaileek erabaki dute txirrindulariak 13:20an hasiko direla lehian, eta aurreikuspena da 17:08tik 17:29ra bitartean bukatzea.

Ziklistek hiru mendate puntuagarri igo beharko dituzte, lasterketako hamabosgarren egunean; horietako bi hirugarren mailakoak dira, eta bestea, zehazki azkena, helmugarako berrogeita hamar bat kilometro geldituko direnean, bigarrenekoa. Aurreneko igoera Cote de Saint-Ferreol izango da, 72,8. kilometroan, eta bigarrena, 86,6.ean, Cote de Soreze. Pas du Sant da bigarren mailako mendatea, eta horrek 116,6. kilometroan du pankarta; 2,9 kilometroko igoera da, laburra, baina gogorra, batez beste % 10,2ko malda baitu.

Egunero bezala, EITBk zuzenean emango du etapa: 15:00etan, eitb.eus-ek eta ETB1ek bat egingo dute lasterketarekin.

ETAPAKO PROFILA

2025eko Frantziako Tourreko 15. etapako profila. Irudia: A.S.O.