Remco Evenepoelek irabazi du erlojupekoa, Caenen, eta Tadej Pogacar Frantziako Tourreko lider berria da

Soudal Quick-Step taldeko Remco Evenepoel txirrindulari flandriarrak 2025eko Frantziako Tourreko bosgarren etapa irabazi du, Caenen jokatu duten 33 kilometroko banakako erlojupekoa, asteazkenean; sailkapen nagusian, ordea, UAE taldeko Tadej Pogacar ziklista esloveniarra lehen postuan jarri da, eta, hortaz, maillot horia bereganatu du. Evenepoelek, erlojupekoan egungo munduko txapelduna bera, 16 segundoko aldea lortu du Pogacarrekiko, eta 1:21 Jonas Vingegaardekiko; Visma-Lease a Bikeko danimarkarrak 1:05 galdu du Pogacarrekiko, eta, hala, galtzaile atera da erlojuaren kontrako saioan.

Evenepoelek garaipen bikaina eskuratu du. Txirrindulari flandriarra, gaur egun, munduko onena da erlojupekoetan; iragarpenek faboritotzat jotzen zuten, eta bete egin ditu iragarpen horiek. Pogacar ere ibili da oso ondo, beste behin; asteartean erdietsitako garaipen bikainaren ostean, soilik Evenepoel gailendu zaio lider berriari, etapan. Esloveniarrak Mathieu van der Poeli kendu dio maillot horia; Alpecin-Deceuninck taldeko ziklistak igandean lortu zuen horiz janztea.

Arestian esan bezala, Jonas Vingegaard, aldiz, ez da ondo aritu. Frantziako Tourra irabazteko beste hautagai nagusiak ez du eman espero zen maila. Vismako ziklista hamahirugarren sailkatu da erlojupekoan, eta uste baino denbora gehiago galdu du, gainera. Sailkapen nagusian, Vingegaard laugarren tokian dabil, eta Pogacar minutu bat eta 13 segundora du; Evenepoel eta Kevin Vauquelin (Arkea-B&B Hotels) ere aurretik ditu, oraingoz.

3:14

Evenepoelentzat erlojupekoa, Pogacarrek liderraren maillota jantzi, eta Vingegaardek kolpea jaso du

Ostegunean, 2025eko Frantziako Tourreko seigarren etapa jokatuko dute. Lasterketa Bayeuxen hasi eta, 201,5 kilometro eginda, Vire Normandien amaituko da. Zaleok EITBren bidez gozatu ahalko dugu mendi ertaineko etapa honetaz; eitb.eus 14:00etan hasiko da ematen, eta ETB1 15:00etan.

Etapako sailkapena

1 - Remco Evenepoel (Soudal) 36:42

2 - Tadej Pogacar (UAE) + 0:16

3 - Edoardo Affini (Visma) + 0:33

4 - Bruno Armirail (Decathlon) + 0:35

5 - Kevin Vauquelin (Arkea) + 0:49

6 - Florian Lipowitz (Red Bull) + 0:58

7 - Ivan Romeo (Movistar) + 1:02

8 - Joao Almeida (UAE) + 1:14

9 - Luke Plapp  (Jayco) + 1:17

10 - Pablo Castrillo (Movistar) + 1:18

Sailkapen nagusia

1 - Tadej Pogacar (UAE) 17:22:58

2 - Remco Evenepoel (Soudal) + 0:42

3 - Kevin Vauquelin (Arkea) + 0:59

4 - Jonas Vingegaard (Visma) + 1:13

5 - Matteo Jorgenson (Visma) + 1:22

6 - Mathieu van der Poel (Alpecin) + 1:28

7 - Joao Almeida (UAE) + 1:53

8 - Primoz Roglic (Red Bull) + 2:30

9 - Florian Lipowitz (Red Bull) + 2:31

10 - Mattias Skjelmose (Lidl) + 2:32