UCIk ez dio WorldTour lizentzia eman Laboral Kutxari, eta taldeak Continental maila izaten jarraituko du

Nazioarteko Txirrindularitza Federazioak (UCI) ez dio UCI Women's WorldTour lizentzia eman Laboral Kutxa-Euskadi Fundazioa taldeari, 2024ko eta 2025eko denboraldietarako, euskal taldeak asteartean iragarri duenez, eta, hortaz, Laboral Kutxak UCI Women's Continental Team lizentzia izaten jarraituko du. Nazioarteko txirrindularitzako erakunde nagusiak "kirol irizpideak" baliatu ditu erabakia hartzeko: "Arrakastak egiten duzun horretan tinko sinesten duzunean iristen dira, eta gure ametsak bere horretan dirau", adierazi du Laboral Kutxak, ebazpenaren berri izanda, X sare sozialean. Gizonezkoetan, Euskaltel-Euskadi, Caja Rural eta Kern Pharma taldeek UCI ProTeam lizentziari eutsiko diote 2024an.

Testuinguru horretan, Laboral Kutxaren eskaria zen UCIk WorldTour lizentzia duten taldeetako zerrendan sartzea, alegia, nazioarteko txirrindularitzako maila gorenean sartzea; UCIk, baina, maila horretako 15 lizentzia esleituta, ez du Laboral Kutxa zerrenda horretan jarri: "Datorren urtean", iragarri du Laboral Kutxak, "ez gara WorldTeam taldea izango, baina ez da izango saiatu ez garelako eta UCIri horretarako prest gaudela erakutsi diogulako", zehaztu du.

UCIk azaldu duenez, emandako lizentziek hurrengo bi denboraldietarako indarraldia izango dute; bi urte barru esleituko dituenak, ordea, hiru urterakoak izango dira.

Gizonezkoetan, Euskal Herriko hiru talde profesionalek, alegia, Euskaltel-Euskadik, Caja Rural-Seguros RGAk eta Kern Pharmak, UCI ProTeam lizentziari eutsiko diote 2024an; hala, nazioarteko txirrindularitzako bigarren mailan jarraituko dute.