Pocagar lider da erakustaldia emanda, eta Landa laugarren da etapan eta sailkapenean

Tadej Pogacar 2020ko Frantziako Tourreko irabazleak kolpea eman du larunbat honetak Tirreno-Adriatiko lasterketan jokatu duten laugarren etapan. UAE Team Emirateseko esloveniarrak erakustaldia eman du, Terni eta Prati di Tivo artean egin duten 148 kilometroko ibilbidean.

22 urteko txirrindulariak sasoi betean dagoela erakutsi du eta bakar-bakarrik sartu da Prati di Tivo mendateko helmugan. Sei segundo geroago sartu da Simon Yates britainiarra (Team BikeExchange) eta 29ra Sergio Higuita kolonbiarra (EF Education-Nippo). Higuitak Mikel Landa gainditu du azken metroetan eta arabarra laugarren izan da azkenean.

Horrela, Pogacar da orain lasterketako liderra, Wout van Aerti lehen postua kenduta. Belgikarra lidergoa defendatzen saiatu da, eta eraso ugari jaso ditu azken kilometroetan, baina azkenean bederatzigarren sartu da 45 segundora.

Amaierarako hiru etaparen faltan, Pogacarrek 35 segundoko aldea du Van Aertekin eta Higuitarekin. Mikel Landari, berriz, 38 segundo ateratzen dizkio.

Igandean, 56. edizioko bosgarren etapa jokatuko dute, 205 kilometrokoa, Catellalto eta Castelfidardeo artean.