Castroviejo: 'Euriagatik ez dudala irabazi uste dut'

Jonathan Castroviejo bigarren izan zen Europako Txapelketako erlojupeko proban eta ez zuen garaipena lortu, 69 zentesimagatik. Euriagatik urrezko domina lortu ez zuela uste du bizkaitarrak eta pena eman dio garaipenak segundo bat baino gutxiagogatik ihes egin izanak.

"Nahiko pozik nago eman dudan mailarekin. Zalantzak nituen ez nekielako Tourraren ostean nola erantzungo nuen. Azkenean, garaipenak euriagatik ihes egin didala uste dut. Ez nuen arriskurik hartu nahi, ez erortzeko", esan zuen Castroviejok Espainiako Txirrindularitza Federazioari eskainitako elkarrizketan.

Txirrindulari bizkaitarrak 69 zentesimagatik ez zuen proba irabazi. Horren inguruan ere hitz egin du Getxokoak: "Lasterketak horrelakoak dira. Batzutan irabazi eta beste batzutan galdu egiten dira. Pena da segundo bat baino gutxiagogatik bigarren amaitzea, baina pozik nago".