Quintana eta Nibali aurtengo Tirrenon izango dira

Tirreno Adriatikoko antolatzaileek ostiral honetan  jakitera eman dutenez, lasterketa korritzen izango dira hura bi aldiz irabazitako Nairo Quintana kolonbiarra (Movistar) zein Vincenzo Nibali italiarra (Bahrain).

Martxoaren 7tik 13ra jokatuko den itzulia 21,5 kilometroko taldekako erlojupeko batekin hasiko da Lido di Camaiore herrian. Horrenbestez, hasieratik bertatik aldeak ikusi ahal izango dira sailkapen orokorra lehiatuko duten txirrindularien artean.

Bigarren eta hirugarren etapak behin igarota, Follonican eta Trevin amaituko direnak, hurrenez hurren, jardunaldi garrantzitsuena laugarrenean helduko da, Sasso Tetto gainean bukatuko den etapan lehiakideek % 7,1eko bataz besteko gogortasun maila duen 10,5 kilometroko igoerari egin beharko baitiote aurre.

Bosgarren egunean Michele Scarponi zena gogoan izango dute; izan ere, helmuga haren jaioterrian egongo da. Inguru haietan hil zen txirrindulari italiarra joan zen urtean, entrenatzen ari zela.

World Tourreko parte den itzuli horren azken txanpan, ohikoa den 10,5 kilometroko erlojupekoa jokatuko dute San Benedetto del Tronto herrian.