Italiako Giroko 12. etaparen ibilbidea, profila eta ordutegiak: Martinsicuro-Fano (193 km)

Maiatzaren 16an, osteguna, jokatuko duten 2024ko Italiako Giroko hamabigarren etapak, Martinsicuron hasi eta Fanon amaituta, 193 kilometro ditu. Tropela 12:30ean jarriko da martxan, eta irabazlea 16:59 eta 17:28 artean iristea aurreikusi du antolakuntzak.

Mendiko Sari Nagusirako puntuagarriak diren lau igoera ditu ibilbideak, 4. mailakoak denak: Osimo (93,2. kilometroan), Monsano (126,8. kilometroan), Ostra (138,4. kilometroan) eta La Croce (150,6. kilometroan). Horiez gain, eta puntuak pilatzeko balio ez duen arren, amaieran igo beharreko Monte Giove nabarmendu du antolakuntzak. Izan ere, batez beste %10 baino gehiagoko aldapak ditu, eta etaparen zati erabakigarrian dago.

Txirrindulari ausartentzat eta trebeentzat aproposa da iritsiera, azken kilometroak bihurgunez jositako ingurune batean egingo baitituzte, Fanoko erdigune historikoan. Azken 1000 metroetan, gainera, ibilbideak goruntz egiten du apur bat.

Ez galdu Giroko hamabigarren etaparen xehetasunik, EITBk zuzenean eskainiko duelako. 12:15ean, eitb.eus-en; ETB1en, ostera, 15:00etatik aurrera.

ETAPAREN PROFILA

Italiako Giroko hamabigarren etaparen profila. Irudia: giroditalia.it

AZKEN KILOMETROAK

Italiako Giroko 12. etapako azken kilometroak. Irudia: giroditalia.it