Etapa eta lidergoa Narvaezentzat; eta Pogacar, erasokor, hirugarren izan da

Jhonatan Narvaez ekuadortarrak irabazi du (INEOS Grenadiers) Italiako Giroko lehenengo etapa. Orotara, 140 kilometroko ibilbidea egin dute txirrindulariek Venaria Realen hasi eta Torinon amaituta. Narvaez Tadej Pogacar (UAE Team Emirates) sailkapen nagusia irabazteko faborito nagusiari gailendu zaio esprintean.

Etaparen lehen zatia erabat laua izan da, eta zenbait eraso izan dira 8 kilometrotik aurrera taldetxo bat aurretik jarri denean, Louis Barré (Arkéa-B&B Hotels), Nicolas Debeaumarché (Cofidis), Lilian Calmejane (Intermarché-Wanty), Amanuel Ghebreigzabhier (Lidl-Trek), Andrea Pietrobon (Team Polti Kometa) eta Filippo Fiorelli (VF Group-Bardiani CSF-Faizanè) txirrindulariekin.

Ondoren, eta taldetxoak minutu eta erdi luzeko aldea zabaldu duenean, Pogacarren UAE Team Emirates tropeletik tiraka hasi da.

Iheslariak Superga igotzen hasi  dira, 3. mailakoa, helmugarako 78 kilometrora. Calmejanek aurrera jo du eta ihesaldia taldetxo ezberdinetan zatitu da, baina Ghebreigzabhier izan da mendateko gaina lehen postuan pasa duena. Jarraian, biak lasterketa buruan izan dira ibilbidearen beste erdia betetzeke zegoenean.

Helmugarako 28 kilometrora tropel nagusian erorikoa izan da, zortzi txirrindularik lurra jo dute, baina bestelako ondoriorik gabe. Horretaz gain, Colle Maddalenan Calmejaneren eta Ghebreigzabhierren abenturaren amaiera ekarri du.

Atzetik atera dira Biniam Girmay (Intermarché-Wanty) eta Michael Woods (Israel-PremierTech), eta horien ostean Andrea Vendrame (Decathlon AG2R La Worlde) eta Matteo Trentin (Tudor). UAE Team Emiratesek, bestalde, tiraka jarraitu du, Mikkel Bjergen bitartez, batez ere.

Ihesaldiaren amaiera eta Pogacarren erasoak

Tropela bat egin du helmugarako 10 kilometrora, eta Rafal Majkak egindako lanarekin (UAE Team Emirates), etapa graipena Pogacarren aldekoa zela eman du.

Bukaerarako bost kilometro baino gutxiago falta izan direnean, Pogacarrek erasoa jo du eta Narvaez berarekin joan da, Schachmann biekin bat egiten saiatu den bitartean.

Bivio di San Vito horma, Giroko antolatzaileek lasterketaren aurreko asteetan ibilbidean sartzea erabaki zuten koskorra, erabakigarria izan da. Narvaez Pogacar baino azkarrago ibili da azken esprintean, eta Schachmannek ere aurrea hartu dio esloveniarrari azken momentuan. 3:14:23 denbora eginda, ekuadortarra da 2024ko Giroko sailkapen nagusiko lehen liderra.

Etapako sailkapena

1 - NARVAEZ Jhonatan (INEOS) 3:14:23

2 - SCHACHMANN Maximilian (BORA) d. b.

3 - POGACAR Tadej (UAE) d. b.

4 - BAUDIN Alex (AG2R) + 0:06

5 - CONCI Nicola (Alpecin) + 0:10

6 - HERMANS Quinten (Alpecin) d. b.

7 - VANSEVENANT Mauri (Soudal) d. b.

8 - TIBERI Antonio (Bahrain) d. b.

9 - VALTER Attila (Visma) d. b.

10 - THOMAS Geraint (INEOS) d. b.

Sailkapen nagusia

1 - NARVAEZ Jhonatan (INEOS) 3:14:13

2 - SCHACHMANN Maximilian (BORA) + 0:03

3 - POGACAR Tadej (UAE) + 0:06

4 - BAUDIN Alex (AG2R) + 0:16

5 - CARUSO Damiano (Bahrain) + 0:17

6 - CONCI Nicola (Alpecin) + 0:18

7 - HERMANS Quinten (Alpecin) + 0:20

8 - VANSEVENANT Mauri (Soudal) d. b.

9 - TIBERI Antonio (Bahrain) d. b.

10 - VALTER Attila (Visma) d. b.