Nairo Quintana lider jarri da Blockhausen aise gailendu ostean

Nairo Quintana Movistar taldeko kolonbiarra gailendu da Italiako Giroko bederatzigarren etapan. 152 egin dituzte txirrindulariek Montenero di Bisaccia eta Blockhaus artean. Quintana da orain sailkapen nagusiko liderra.

2014ko Giroko irabazleak erasoa jo du, lau aldiz, Blockhaus igotzen ari zirela, azkena, helmugarako 4,7 kilometrora. Quintanak atzean utzi ditu Thibaut Pinot eta Vincenzo Nibali eta bera bakarrik joan da helmugara arte. Hiru ordu, 44 minutu eta 51 segundoko denbora egin du.

Bigarren Pinot frantziarra sartu da, eta hirugarrem, Tom Dumoulin holandarrra, 24 segundora. Bauke Mollemak 39 segundo galdu ditu, eta Vincenzo Nibalik minutu bat.

Mikel Landa, Geraint Thomas eta Adam Yates lehiatik kanpo geratu dira, mendatea igotzen hasi eta berehala eroriko bat izan dutelako errepide ertzean geldi geratu den motor baten ondorioz.

Sailkapen nagusian, Quintanak 30 segundoko aldea du Dumoulin eta Pinotekin.