Intxausti eta Igor Anton, Movistarreko taldeburuak

Beñat Intxausti eta Igor Anton izango dira Movistarreko talde-buruak aurtengo Italiako Giroan. Nairo Quintanak Frantziako Tourrean dauka jarrita arreta osoa eta ez du proba italiarrean parte hartuko.

Movistarreko 'bederatzia' honakoa izango da: Andrey Amador, Igor Anton, Ruben Fernandez, Jesus Herrada, Beñat Intxausti, Ion Izagirre, Juanjo Lobato, Dayer Quintana (Nairoren anaia) eta Giovanni Visconti italiarra.

Taldea osatzeko erabakia azken urteetako zailena izan dela aitortu du Eusebio Unzue managerrak:'Hautatu genituen hamaika txirrindulariak sasoi onean heldu dira. Igor Antonek lan bikaina egin du Euskal Herriko Itzulian eta baita Asturiasekoan ere eta hori erabakigarria izan da".

Intxaustik lan ona egitea espero du Unzuek: "lasterketa ezagutzen du, ondo aritu da eta aurreneko hamarren artean sailkatu da".