RETAbet.es GBCk porrota jaso du CAI Zaragozaren aurka

RETAbet.es GBCk 75-84 galdu du CAI Zaragozaren aurka Illunben. Porrot honekin, Gipuzkoa Basketek ia ezinezko du datorren denboraldian Endesa Ligan jarraitzea.

Partida oso parekatua izan da hasieratik. Talde gipuzkoarrak lehen laurden ona jokatu du, eta nagusi izan da Zaragozako taldearen aurrean. Porfi Fisacek zuzentzen duen taldeak hiru puntuko abantaila lortu du lehen hamar minutuetan (18-15). Bigarren laurdena lehena baino parekatuagoa izan da. Bi taldeetako batek ere ez du markagailuan alde egitea lortu. Parekotasuna handia izan da, eta horren irudia da markagailuak atsedenaldira iristean erakusten izan duen emaitza (34-32).

Lehen bi laurdenak aurretik amaitzea lortu du Gipuzkoa Basketek, baina atsedenaldiaren ostean talde bisitaria izan da nagusi. CAI Zaragozak GBCk baino hobeto jokatu du, eta bost puntuko errenta lortu du hirugarren laurdenaren amaieran (50-55). Azken laurdenaren hasieran, hamar puntuko aldea lortu du CAI Zaragozak (50-60) eta hortik aurrera maldan gora izan du partida Gipuzkoa Basketek. Amaieran, gipuzkoarrek ezin izan dute aurkako emaitza irauli eta porrota jaso dute (75-84).

Fitxa teknikoa:

75.- RETAbet.es Gipuzkoa Basket: Llompart (12), Dean (14), Grimau (5), Landry (14), Agbelese (6)- hasierako bostekoa- Doblas (9), Vrkic (13), Olaizola, Otegi (2), Motos, Lawrence eta Soluade.

84.- CAI Zaragoza: Bellas (4), Linhart (5), Benzing (15), Fotu (8), Norel (6)- hasierako bostekoa- , Pere Tomas (4), Kravtsov (12), Jelovac (25), Henry (4). Sastre (1) eta Sergi Gracia.

Epaileak: Conde, Guirao eta Sacristan.