Agustin Ubal joko-antolatzaile uruguaitarra Bilbao Basketen arituko da, Bartzelonak utzita

Surne Bilbao Basketek baieztatu duenez, Agustin Ubal joko-antolatzaile uruguaitarra Bizkaiko taldera helduko da Bartzelonak utzita, luzarorako min hartuta dagoen Tomeu Rigo ordezkatzeko. Izan ere, Balearretako jokalaria hainbat hilabetez izango da baja, belauneko lesio larri baten ondorioz.

Ubalek 19 urte eta 1,98ko altuera du. Joan zen denboraldian hamabi partida jokatu zituen Endesa Ligan, horietako hiru Bartzelonarekin (Euroligan ere debuta egin zuen) eta gainerako bederatziak Rio Breogan Galiziako taldearekin.

"Uste dugu Ubal talentu handiko jokalaria dela. Lehenik eta behin, gazteen anbizioa eta energia eman behar dizkigu. Gainera, kalitatea eta fisiko ona duen jokalaria da, eta egunerokoan zein jokatuko ditugun bi txapelketetan laguntzea espero dugu", adierazi du Rafa Pueyok, Bilbao Basketeko kirol-zuzendariak.