Bilbao Basketek atzerapausoa eman du Estudiantesen aurka galduta

Dominion Bilbao Basketek 81-70 galdu du Movistar Estudiantesen aurka eta talde bizkaitarrak atzerapausoa eman du playoff postuetan sartzeko lehiari begira.

Estudiantesek argi izan du partida hau irabazi beharra zeukala mailari eusteko aukerak izaten jarraitzeko eta lehen minututik garaipenaren bila atera dira. Lehen hamar minutuetan bost puntuko aldea lortu du Madrileko taldeak (17-12). Bigarren laurdenean Bilbao Basketek bere jokoa hobetu eta norgehiagoka parekatzea lortu du. Estudiantesek jarraitu du aurretik markagailuan, baina talde bizkaitarra lau puntuko desabantailarekin soilik iritsi da atsedenaldira (39-35).

Atsedena hartu eta kantxara itzultzean, partidaren gidoia ez da batere aldatu; markagailuan Estudiantes agintzen, baina Bilbao Basketengandik gehiegi aldendu gabe. Ondorioz, hirugarren laurdena etxeko taldearen aldeko 64-58ko emaitzarekin amaitu da. Azken laurdenaren hasieran Estudiantes, Bilbao Basket baino gehiagoizan da, eta 14 puntuko abantaila lortu du Madrileko taldeak. Geratzen izan den denborarekin, desabantaila handiegia izan da Dominionentzat eta Movistar Estudiantesek lortu du garaipena (81-70).

Fitxa teknikoa:

81 - Movistar Estudiantes (17+22+25+17): Fernandez (10), Laprovittola (25), Martin (9), Simpson (13) eta Hernangomez (12) -hasierako bostekoa-, Pumprla (-), Rey (2), Bircevic (2), Salgado (8) ea Brizuela (-).

70 - Dominion Bilbao Basket (12+23+23+12): Hannah (11), Mumbru (14), Bertans (19) Hervelle (3) eta Bogris (8) -hasierako bostekoa-, Lopez (2), Borg (-), Suarez (6), Begic (7) eta Todorovic ().

Epaileak: Carlos Peruga, Fernando Calatrava eta Martin Caballero.