Zabaletak eta Aldaik jokatuko dute Emakume Master Cupeko Lau t'erdiko finala

Goiuri Zabaletak eta Amaia Aldaik jokatuko dute Emakume Master Cupeko Lau t'erdiko finala. Zabaletak 22 eta 19 irabazi dio Garairi; Aldai, aldiz, 22 eta 3 gailendu zaio Arrillagari.

Lehen finalerdian, Leitzako pilotariak asko sufritu du 22ra iristeko, nahiz eta hasieran 8 tantoko aldea izatera ere iritsi den. Ordubete iraun du partidak, eta latz lan egin behar izan dute biek tantoak egiteko. Zabaleta 11-19 aurretik zela, Leire Garaik ez dio lan erraza jarri, aldea 19-20 estutu ostean. Azkenean, Zabaleta izan da finalerako txartela lortu duena.

Bigarren finalerdian, Amaia Aldai egungo txapeldunak arazo handirik gabe gainditu du Miriam Arrillaga. Hasierako 5 eta 0eko partzialak bidea argitu dio Dimako pilotariari. Hortik aurrera, Arrillagak ezer gutxi egin ahal izan du Aldairen nagusitasunaren aurreran. Amaieran tanto lehiatuagoak ikusi ditugun arren, 22-3 izan da azken emaitza. Aldaik hirugarren finala jokatuko du, jarraian.

Final handia abenduaren 17an jokatuko udte, Durangoko Ezkurdi pilotalekuan, 12:00etatik aurrera.