Irribarria eta Rezusta, txapeldunak

Iker Irribarria eta Beñat Rezustak aurreikuspenak bete dituzte eta Oinatz Bengoetxea eta Mikel Larunbe mendean hartu dituzte Binakako Txapelketako txapela janzteko. 3.000 zale bildu dira Bilboko Bizkaia pilotalekuan final handia ikusteko.

Irribarriaren bigarren txapela da, Buruz Burukoa irabazi ostean. Aramakoa pilotako izarra bihurtzen ari da. Rezustarentzat, berriz, irabazten duen lehen txapela da Binakakoa. Bergarakoa finaleko pilotaririk onena izendatu dute.

Finalaren nondik norakoak aurreikusitakoak izan dira. Irribarria eta Rezusta pilotak Bengoetxearen gainetik pasatzen saiatu dira Mikel Larunbe gaztearen jokoa zigortzeko. Galdakoztarrak huts ugari egin ditu hasieran, gero hobera egin du, baina norgehiagokaren amaieran lekua galdu du, presioak eta erantzukizunak gaindituta.

Partida berdinduta joan da 6na egin duten arte. Gorriei kosta egin zaie partidan sartzea, eta horrek urdinei mesede egin die. Hala ere, 6 eta 0eko partzialari esker, eta Irribarriak lekua hartu duela aprobetxatuta, aldea zabaltzen hadi dira, garaipena bideratuz (11-6).

Hala ere, urdinek ez dute amore eman. Oinatz erasokor aritu da aurreko koadroetan eta Larunbek, berriz, hobera egin du nabarmen atzean. Ondorioz, 13 eta 12 hurbiltzea lortu dute. Baina Larunbe berriro huts egiten hasi da eta horrek garaipena eskura jarri die Aspeko pilotariei. Azkenean, 22 eta 14, Irribarria eta Rezusta txapeldun.

Finaleko tanto guztiak:

0-1, 1-1, 1-2, 1-3, 2-3, 3-3, 4-3, 4-4, 4-5, 5-5, 5-6, 6-6, 7-6, 8-6, 9-6, 10-6, 11-6, 11-7, 12-7, 12-8, 12-9, 13-9, 13-10, 13-11, 13-12, 14-12, 15-12, 16-12, 16-13, 17-13, 18-13, 19-13, 20-13, 21-13, 21-14, 22-14.