Irujo-Rezusta izango dira Olaizola-Urrutiren aurkariak, finalean

Juan Martinez de Irujok eta Beñat Rezustak Binakako Txapelketako finala jokatuko dute Olaizola II.aren eta Urrutikoetxearen aurka, azken finalerdian Bengoetxea VI.ari eta Untoriari 22 eta 8 irabazi ostean.

Partidak ez du kolorerik izan, Irujo eta Rezusta jaun eta jabe izan baitira hasieratik. 0 eta 4 jarri dira aurretik lehen minutuetan, eta gorriak ez dira gai izan aurkariak estutzeko. Untoriak amore eman behar izan du atzeko koadroetan Rezustaren sasoi bikainaren aurrean, eta Oinatzek, berriz, ezin izan du Irujo mendean hartu. Iberokoak 11 tanto egin ditu orotara. Partidan 475 pilotakada eman dituzte.

Egoera horretan, norgehiagoka aurrez jarri zaie urdinei, 7 eta 14 ere izan dira aurretik.

Ondorioz, Irujok eta Rezustak neurtuko dituzte indarrak finalean Olaizola II.aren eta Urrutikoetxearen aurka. Finala apirilaren 9an jokatuko dute, Bilboko Bizkaia pilotalekuan.